Boks. Ruslan Abdullaev professional boksdagi ikkinchi jangini o'tkazib, chempionlik kamariga ega chiqdi

AQShda “Golden Boy” promouterlik kompaniyasi tomonidan tashkil etilgan boks oqshomida Abdullaev filippinlik Jino Rodrigoga qarshi ringga ko'tarildi. To'liq 8 raundlik jang asosan o'zbekistonlik sportchining tashabbusi ostida o'tdi.

To'liq davom etgan bahsda hakamlar bir ovozdan 80-71 hisobida Ruslanning g'alabasini e'lon qilishdi. Shu tariqa u WBA super engil vazn toifasida “Continental Americas Gold” kamarini qo'lga kiritdi.

Eslatib o'tamiz, Abdullaev mart oyida professional boksda debyut jangini meksikalik Xose Valenzuela Alvaradoga qarshi o'tkazgan va nokaut evaziga g'alaba qozongandi.