Rasman! «Borussiya» Pulishichni «Chelsi»ga sotdi

Dortmundning “Borussiya” klubi yarim himoyachisi Kristian Pulishich keyingi mavsumdan “Chelsi” sharafini himoya qiladi. Bu haqda “Borussiya” klubi rasmiy sayti xabar berdi.

Kelishuvga ko'ra, 20 yoshli xavbek Dortmund klubida mavsum yakuniga qadar ijara asosida to'p suradi.

“Chelsi” amerikalik futbolchi transferi uchun 64 million evro to'laydi. Shu bilan birga Pulishichning ijarasi “Borussiya” uchun tekinga tushadi.

Ma'lumot o'rnida, Pulishich “Borussiya” akademiyasiga 2015 yil kelgan va 2016 yil Bundesligada debyutini o'tkazgan. Kristian 2016/17 yil mavsumida dortmundliklarning asosiy futbolchisiga aylanishga ulgurgan edi.